رأي يكتبه الدكتور محمد الحجيري : شو سبب انه عدد كبير من اوائل كليات الطب الاردنيين بتخصصوا في اميركا و ما يرجعو لبلدهم ؟
هاد الويكند عم بكتب رسائل التوصية لطلابي الي اشتغلو معاي سواء في امريكا او عمان و مقدمين على التخصص في اميركا. شباب و صبايا زي الورد متفوقين رح تخسرهم الاردن يمكن للأبد و تحتضنهم امريكا و تعطيهم جوازات سفر ورواتب. رح يسافرو مش لانهم ما بحبو بلدهم! ابداً! بس معظمهم بحكولي انهم لازم "يهربو من الظلم".
شو سبب انه عدد كبييييير من اوائل الكليات و غيرهم بيجو بتخصصو في اميركا و ما يرجعو ؟ لا_أعمم بس بلدهم الي يمكن كانت رح ترميهم في الطوارئ لحالهم و يقترفو جرماً عن جهالة، او يتخصصو في مكان ولا حد يعلمهم اشي خوفاً من المنافسة، للحالمين بالابحاث منهم يمكن ينتهي فيهم المطاف مع حد ياخد تعبهم او منشور في مجلة وهمية (من اكتر عشر دول نشر في مجلات وهمية) او يمكن يطالبو بحقهم يلاقو حالهم في السجن بجرائم الكترونية ،و الأضرب لو فسدو هم كمان ويصير في جيبة شركات الادوية و السفرات ، لا اعمم ابداً و هيني بكتبها مرة تانية بس هاي القصص واقع منتشر !!
الناس ما بتيجي تتخصص باميركا عشان بياخدو راتب (بديهي)ا و في شخص يعلمهم، و اشراف من اخصائي هو بتحمل المسؤولية عن كل مريض ، و مش عشان في شغل بعدها مضمون، و احيانا رواتب خيالية و تقاعد…. هاد ولا اشي، هم بدهم بحسو بالعدالة و احترام لكرامتهم و العيشة بسلام بعيد عن المافيات الطبية و البهادل و التشنج،
فمبروك للظالمين من اصحاب المصالح! جيل بعد جيل عم تنجحو بتطفيش!
شكر للوقائع و لخبرني انهم نشرو بوستي الفيسبوك عن فترة تدريبي بس قصتي كانت قبل ١٥ سنة. يعني خلال ١٥ سنة هدول الوضع ضل زي ما هو! وفقط قبل يومين صدر قرار من وزارة الصحة يوجب على الاخصائيين وجودهم بشكل دائم! بس قبل يومين؟
وسلامة تسلمكم
مرة تالتة لا أعمم عشان الفلسفة
حجيري
